Auh in huel in toca catcâ in ompa ohuallaque ca quimotocayotiaya Aztecâ Chicomoztoca inic quitoa in canin hualquízque inic huallaquê Chicomoztoc Aztlan Auh niman quimotocayotique Colhuaquê Chichimecâ ye hica in ômpa ohualquiztihuallaque in huei Colhuacan huei Chichimetlalpan inic oquímotocayotique Colhuaque Chichimeca Chicomoztoca Azteca Auh ca zatepan oquimo otocayotique in ontlamantli in acachto ic oquimotocayotique Tenochca ipampa yehuatl oquihualyacantia in intlatocauh inteyacancauh ohualmochiuhtia inic oncan ohualacico in oncan oquitocayotique Tenochtitlan Auh yequenê zatepan oquintocayotique in ixquichtin altepehuaque in Azcapotzalcâ in Tepanecâ ic mocenteneuhticate Tlacopanecâ ye mochitin in huicalhuan in Coyohuaque Atlacuihuayancalquê inic oquintocayotiquê Mexixiquilquani ypampa ca cenca capizquaya in Mexixquilitl Auh za oc ontlamelauhcateneuhque Mexica aocmo oquitzonquixtique in Mexixquilquani za Mexica Mexitin ihuan Mecitin yeica in tlacatelotl in quitocayotia Tetzauhteotl quimilhui ca in yehuatl in Metztli ca ici inic nomotocayotique Mecitin