¶ In Otomjtl in jtoca itech qujça itech mana in jtoca in achto inteiacancauh mochiuh in Otomj qujl itoca catca oton in jpilhoan in jtech qujzque ioan in jtlapacholhoan mochtin motocaiotia otomj in ça çe Otomjtl Injque y otomj intech ca in tlacanemjliztli in oquichti motlalpilia motlaquentia maxtleque caqueque in cioa cueieque vipileque in oqujchti qualli in jntlaquen in jntilma in jncac in cioa qualli in jncue in jnvipil tlatocati tepachoa pilti tecuti vncan mjtoa calpixquj vncan tlaiacanqui vncate tlamacazque yn mjtoa otontlamacazque vnca in jnveiteupixcauh in jtoca tecutlatoa vnca in jntlamatinjuh in qujlhuja in qujtocaiotia tlaciuhquj qujtoznequj qujtlaçilhuj qujnevivili qujqujxti anoço iuhquj in teutl qujnnotzaia no qujnnotzaia in teteu in tlein qujntlatlanjaia qujlhujaia intla monequj iaoqujçazque in otomj qujlhujaia in aço iaomjqujzque qujlhuja in [fol r
