30r 73

] In jpan nauhecatl tonalli mjtoa qualli ioan amo qualli ca vncan mjctiloia qujnquechmecanjaia qujnquechtzonviaia qujnmecanjaia qujnpiloa qujncuexcochvivitequj qujnquatepipitzinja in moteneoa tlaçolchiuhque in tetlanxinque çan iooan in mjctiloia in oallatvi ie tlacujtlapoçaoa atlan qujmonmamaiavi No ioan cequjn vncan mjquja in mamalti iuh mjtoa ca iehoan inca mozcaltiaia in Motecuçoma (in iuh omoteneuh) ipan ce qujauitl in vncan temoa auh ie no vncan tepopoloaia in omoteneuhque tlatlacateculo in nanaoalti auh injc imacaxoia in ipan in tonalli nauecatl in tlecalco noujian caaqujaia in tlacateculoxocovitztli qujpopotzaqujaia qujcâcacatztzaia iuh mjtoa ca ic qujnpeviaia Auh in iehoantin pochteca in moteneoa acxoteca in oztomeca in motlacamati iê qujveimatia qujmaviztiliaia ca vncan qujtotonjaia in jxqujch tlaçotli qujtlatiaia in chalchiujtl in chalchiuhtli in quetzalchalchiuhtli in ololiuhquj in tomatic in acatic in ie ixqujch cozcatl in cozcapetlatl in patlaoac in pitzaoac xiujtl auh in jxqujch nepapan ivitl in quetzalli  in vel iaque in vel vitoliuj in patlaoac in viiac in qujlhuja cezciacatl içan moteca auh in çan totocujtlapiltic ioan in qujlhuja [fol r