ce itoca Xomimitl inyuhqui Teopixque ipan mochihuaya.
Auh in oc cetlacatl itoca Quauhtlequetzqui anozo Quauhcohuatl. Inic ome itoca Ococal, inic yei, itoca Chachallayotl inin Ohtlipan inhualteomamaque, auh in yehuatl; inic nahui initoca in tlamacazqui in Axollohua ca ompa mic ompa cacique in Colhuacan Tizaapan.
Auh in huel nican Tenochtitlan in caxitico inquihualmamaque in Huitzilopochtli, inic ce yehuatl initoca Quauhtlequetzqui, anozo Quauhcohuatl, tlamacazqui Teomama: inic ome itoca Copil teomama: ± inic ey itoca Xiuhcaque teomama: inic nahui, itoca Cuitlachquauhtli teomama: inic macuilli itoca Poyahuitl teomama. Yehuantinin in hualteomamaque in nican acico.
Auh iniquac, ipanin iquac tlatocati in omentin tlatoque Amaquemecan Chalco, inic ce itoca huehue teuhctli Chichimeca teuhctli, ininipiltzin in Atonaltzin Chichimeca teuhctli; inic ometlatoque, itoca Quahuitzatl teuhctli tlayollotlac teuhctli tlatohuani Tzaqualtitlan Tenanco yolticate, iniquac ohuacico Tenochtitlan in Mexica inyuh neztica huehue Xiuhtlapohuallamatl, auh in Culhuacan yenoiuh ompa ce xihuitl tlatocati in huehue Acamapichtli.
Auh niman yenoceppa monahuatia in Mexica yequitohua matic cohuacan in Tetl, in quahuitl, mayehuatl ica in Atlan chaneque, in Atlan onoque in michin, in axollotl, ihuan in cueyatl, in acocillin, in anenez, in acohuatl, in axaxayacatl, in izcahuitli, ihuan in ± canauhtli, in quachilli, in yacacintli, in ixquich in totome in atlanchaneque, mayehuatl ic ticcohuati in tetzintli in quauhtzintli, niman oquittoque mayauhqui mochihua, niman ye ic tlatlama quimanaquimaci in michin, in axollotl, aneneztli, acocillin, in cueyatl, ihuan in ixquichtin in totome in atlannemi. Auh niman oyaque in tlanamacato, ihuan tlacohuato, niman ohualmocuepque ohuallaque oquicuito in tetl in quahuitl atlehuehuey, zan mochtepitoton, auh in quahuitl zan no yuhqui, atle tomahuac zan mochpitzaton in quahuitl, niman ye ic quauhtzotzona in Oztotempa, inic oncan quinelhuayotique in yehuatl altepetl. inical, initeocal in Huitzilopochtli, auh in yehuatlin cazan mochi tepitoton catca in ayauhcalli, auh in onez tetl, inonez inquahuitl, niman yequipehualtia in ayauhcalli oquique chillique. Auh niman yenoceppa yohualtica in yequitohua, ± yenoceppa tenahuatia in yehuatl in Huitzilopochtli, niman quilhui in ye quitoa, tlaxiccaqui Quauhtlequetzquihe anozo Quauhcohuatle, nauhcampa, Ximotlallicân, Ximoxellocân, Xitlatocayotican, auh niman oquitlacamatque, nauhcampa omotlallique in Mexica, auh inoyuh ye nauhcan omotlallique (oquilhui in Quauhcohuatl) ca omochiuh tlamacazque, inicotinechnahuati omoxelloque in motahuan, niman oquito inHuitzilopochtli ca ye qualli. Auh xiquin momamacacan in ixquichtin in tiquin hualhuicaque in amocalpol teohuan in tlacochcalca in cihuatecpan, in huitznahuac in Tlacatecpan, in Yopico, in Tezcacohuac, Tlamatzinco, in mollocoitlillan, in Chalmeca, in Tzomolco, in Cohuatlan in Chillico inizquitla, in milnahuac, in Cohuatlxoxouhca, ma ixnecican nauhcampa xiquinquixtican in Moyotlan, in axcan yemitoa Sn¨ Juan, in Teopan