0v 81

Auh ca in Xiuhtlapohualli ca nanahui in tentiuh in ic ce cacalli in ic ome ca Tochin inic ey ca Acatl inic nahui ca Tecpatl ca in ye mochi ca ompohualli on matlactli omomexihuitl Ca matlactli omome yn calli in iquizayampa in tonatiuh pohui auh no matlactli omey in Tochin Mictlan copa pohui auh no matlactli omey in Acatl Icalaquian in Tonatiuh pohuí auh ca no matlactli omey in Tecpatl iz Cihuatlan pohui in ye mochi años in xihuitl molpia Capitulo Nican mítoa in quenin momatiz ihuan macicacaquiz in ontlamantli in huel yehuatl in Tonalli in tlayacana ihuan inic ontlamantitiuh in motocayotia Iquechol Auh ca otic hualitotiquizque in ipan in Tonalamatlapohualli iz ceceyaca ic omoteneuhque in intotoca iz cecemilhuitl tlahuica in tonalli tlayacattitica cecempantitica Auh niman yehuatl inic ompantitica in motocayotia Iquechol quitoznequí ihuical ixeliuhca Auh inic huel momatiz inic macicaquiz ca in yehuatl in tonal tocaitl in tlayacattitica in acachtopa moteneuhtica ca oncan pehua in itequiuh in yohualnepantla in iquac xelihui in yohualli ihuical in aquin in tlein Citlalin acachto moteneuhtica