0 16

ca inic quinhualpehuaya Mexica, iniquac temachuetzico yequiniquac oncan quimacac in Quauhtlequetzqui in Azcatlxochtzin ocquipilhuatitia oncan tlacat initoca Cohuatzontli, itlazopiltzin in Quauhtlequetzqui ipampa in inamohuelmomati mellahuac ocquezqui xiuhti in Quauhtlequetzqui inoyuhtemac huetzico Copil macihui inipan ce Calli xihuitl quimachiyotia huehuetque in mic yece camoyaomic zan momiquilli oncan in Chapoltepec intlein ipan xihuitl. Auh yece inipan omoteneuh Ce calli xihuitl ye mellahuac inipan quinhualpehuaya Mexica in Malinalca in oncan Chapoltepec, yehuatl iquac mic in Copil. Auh in Mexica niman ic yaque Acuezcomac quizque huehuetlan atlixocan, teoculhuacan, Tepetocan, Huitzilac, Culhuacan, Huixachtla, Cahualtepec, Tetlacuixomac, Tlapitzahuayan motlallito, ± ipan ome tochtli xihuitl, 1286 años, in motecato cequintin Mexica in Tlapitzahuayan ompa matlac xiuhtito. 11 Acatl xihuitl, 1295 años, ipanin yepan Quecholli inin metztlapohual catca, huehuetque, inic Zacatla quiquizaya Mexica zan quin motetzanhuiaya inin tzoncuetlaxquitlalia Mexica in Chachalca, oncan quin chololtique quin tetepachoque, ye noceppa ompa yahque in Chapoltepec, iquac in tlatocauh mochiuhticatca in huehue Huitzilihuitl in Mexica. Auh inic ontlamantli in oncan mochiuh in Chapoltepecuitlapilco, oncan quinyaoyahualloque in Mexica in ixquich in Tepaneca Azcapotzalca, ihuan in Culhuaque, in Xochimilca, in Cuitlahuaca, ihuan in Chalca, ompa mocenquixtique mocentlallique in altepetl ± ipan tlaca inixquichtin in ompa in Chalco ichan initoca huehue Cacamatl teuctli in tlatocauh catca in Chalca Amaquemeque, oihui inin quitohua Mexica. {N°13} Auh yece inehuatl nican ninotocatenehua Domingo de San Anton Muñon Chimalpahin, onic tepotztocac onic nemilli in Chalca Xiuhtlapohuallamatl iniquac ipanin yaoyahualloloque Mexica in oncan Chapoltepec, inipan Ome Acatl xihuitl, 1299 años, oc yehuantin inpan iquac tlatocati in hueloc Chichimeca tlatoque in acico Chalca tlalpan, inic ce itoca Yacahuetzquiteohua teuhctli in tlatocauh, ihuan imacicauh in Chalca in Tlalmanalca. Auh inic ome itoca Atonaltzin Chichimeca teuhctli tlatohuani in tlatocauh, ihuan imacicauh in Totollimpaneca in Amaquemeque: inic ey itoca Quahuitzatl teuhctli tlaillotlac teuhctli intlatocauh ihuan no imacicauh in Tenanca: inic nahui itoca Itzquauhtzin atlauhtecatl teuhctli in tlatocauh in ± Tenanca atlauhteca, ihuan occequintin in Chalco tlatoque in amo nican niquintoca tenehua inimpan mochiuh inic yaoyahualloloque Mexica in oncan Chapoltepec, auh in quitenehua Mexica initoca huehue Cacamatzin ca aicotlatocat in Amaquemecan zan mochipa tlatocapilli catca huey tiacauh ye ixhuiuhtzin in Atonaltzin Chichimecateuhctli tlatohuani Amaquemecan, auh ye quin zatepan inomonemiltico Tlalticpac ayemo ipan in oncan quitenehua Mexica.