ihuan in chimalli ipan motlallique in atlan, inic hualpanoque, inic quin hualtocaque in Culhuaque. Auh niman ic oncan acico in oncan tollihtic, acaihtic in Mexicatzinco, oncan quitzonicpilloque initoca Acatzin oncan quitillique initzinco quiminque ic oncan tlatocayotique Mexicatzinco, niman ye oncan quihuahuatza inopaltic, inin yaotlatqui inin tlahuitz, inin chimal, inixquix, inin tlatqui, auh in yehuantin inin cihuahuan ininpilhuan niman yemochoquillia quitohua campantihui mazan nican tiecan in acaihtic, niman oncan motlallique, niman ye oncan quiquetza in temazcalli oncan callacque inihtic in temazcalli, niman ye motema, ± auh inic tlaquallanique oncan tetzinco mayauhque in temazcalco, niman yeic quinhualtoca (yehuitze teocohuapanquizaco) atlan quintepehuato, zanno tollihtic, acaihtic in motlallico oncan cetlacatl momiquilli itocahuito oncan quitlatique ininacayo, mochi in amapanitl, inic mitohua motenehua mopantlatillique in Mexica huehuetque inic nexticpac mitohua. Auh niman ye ic huitze hualmiquanique, zan no oncan Acaihtic in Tollihtic in motlallico itocayocan Iztacalco in Mexica quinhualyacantia initoca Tenochtzin, niman oncan ye quichihua, quitlacatillia itoca Amatepetl tzohualli in quichiuhque quitzontecontique, quitlactique, quimahmatique, quicxitique, inoquitlacaquetzque niman ye ic quitlaquentia quipantique, niman ye ic quicuicatia cenyohual in quicuicatique in oncan Iztacalco (oncan quicuiqueuhque in tlacateccatl Culhuacan initoca ± Tetzitzillin) niman ye ic huitze in aihtic itocayocan Pantitlan, oncan motlallique huecauhque in oncan catca in Pantitlan, auh niman ye huitze oncan Zan notollihtic, acaihtic in oncan motlallique, niman oncan ce tlacatl mixiuh ininpiltzin inimichpoch in Mexica itoca Quetzalmoyahuatzin, auh iniconeuh itoca Contzallan. Auh ipan in cemilhui tonalli chiucnahui hecatl yehuatl ipampa in axcan itocayocan Mixiuhcan, niman ye ic huitze oncan motlallico in oncan ihcac icaltzin San Pablo Ytepotzco, in oncan quichiuhque quiquetzque in Temazcalli, oncan quitenque inimichpoch in Mexica initoca Quetzalmoyahuatzin oncan omote ininan in Contzallan, inic motocayotia in Temazcaltitlan, oncan motenque mochintin in ± Mexica oncan motlallique yecate, auh niman oncan onehuaque oyahque in tollihtic in acaihtic in oncan in axcan motocayotia Toltzallan, Acatzallan, niman inic oyaque in Mexica huehuetque initoca in Quauhtlequetzqui, anozo Quauhcohuatl, ihuan noyehuatl initoca in Axollohua tlamacazqui imomextin yahque intlatemoto in canin motlallizque, auh ino ipan quizato inoquittaque cenca miectlamantli in tlanahuizolli in oncanca in acaihtic caye ihca ipampa in nahuatil yuhquimilhui in Huitzillopochtli in teomamaque in itahuan in Quauhtlequetzqui anozo in Quauhcohuatl in Axollohua tlamacazqui ca quin nahuati ca yuhquimilhui in ixquich in oncan inonoc in tollihtic in acaihtic in oncan ihcaz, in oncan tlapiez in yehuatl in Huitzilopochtli ca itencopa quimilhui ca yuhquin nahuati in Mexica, auh niman
