] in cochcaiutl in neeuhcaiutl auh ie iehoatl in totech vmpilcac in toquezpan in toquechtlan tocompiloa cuix oc commati in quen poliuj in jtlacachioal in cujx calaqujloz in cujx noço njman vncan vetziz tequjtl ma çan ivian ma çan iocuxca qujvalmanjliz ma ixillan ma itozcatlan ma imacochco ommotecatiuh in tonan in tota in tonatiuh in tlaltecutli ca amo ticmotlanevilia ca vncan pouhquj ca vncan itauhquj ca ipan motlacatili ca iuhcan oaliualoc in catlitiz in qujtlaqualtiz in qujtlamacaz in tonatiuh in tlaltecutli auh ca amo ica timomachtitzinoa ca vncan onoque ca vncan xamantoque in tepilhoan in chalchiuhtin in maqujztin in tlaçoti ca vncan cozcateuh quetzalteuh timotemanjlia timotevipanjlia vncan timoteicujlvia